Emil Gautason og félagar í íslenska landsliðinu 17 ára og yngri voru í dag fyrsta liðið til að tryggja sig áfram í næstu umferð undankeppni EM 2027 í þessum aldursflokki.

Strákarnir áttu mjög vel heppnaða daga í Bosníu og Hersegóvínu þar sem liðið lék gegn heimamönnum en einnig gegn Gíbraltar og Grikkjum. Leikið var í Zenica og Kakanj.

Fyrsti leikur riðilsins var gegn Gíbraltar en þar spilaði Emil 45 mínútur í góðum 4:0 sigri sem gaf tóninn fyrir framhaldið í riðlinum. Strákarnir gerðu sér lítið fyrir og unnu alla leiki riðilsins þar sem heimamenn voru lagðir 3:1 á laugardaginn en í dag tryggði Ísland sér toppsætið í riðlinum með sigri á Grikkjum 3:2.

Ekki er ljóst hverjum strákarnir mæta í næstu umferð en það verður í fjögurra liða riðli þar sem eitt lið fer áfram á lokamótið í Lettlandi. Ísland og Bosnía voru fyrstu liðin til að tryggja sig áfram í næstu umferð.

Emil hefur leikið frábærlega með ÍBV á tímabilinu en hann hefur skorað virkilega mikið bæði í 2. og 3. flokki ásamt því að hafa leikið frábærlega með landsliðinu sínu á þróunarmóti UEFA í sumar.