Það þarf ekki að fjölyrða um það hversu mikið ánægjuefni það er fyrir ÍBV að hafa fengið þennan mæta son Eyjanna aftur til liðs við ÍBV.

Gunnar Heiðar er 33 ára og vel þekktur sem einn besti knattspyrnumaður sem Eyjarnar hafa alið af sér.  Hann lék í mörg ár hérlendis með Eyjaliðinu og varð fljótt einn af lykilleikmönnum þess liðs.  Gunnar Heiðar lék með Eyjaliðinu árin 1999-2004, og tímabilið 2001 var hans fyrsta heila tímabil.  Hann varð fljótt alræmdur inni í teig andstæðingana og hefur í 83 leikjum hérlendis í deild og bikar, skorað 39 mörk. Hann varð m.a. markakóngur efstu deildar árið 2004 með 12 mörk í 16 leikjum.

Árið 2004 samdi Gunnar Heiðar við sænska félagið Halmstad þar sem hann lék við góðan orðstír og varð m.a. markakóngur deildarinnar. Eftir veruna hjá Halmstad hefur Gunnar leikið með þýska liðinu Hannover, norsku liðunum Valerenga og Fredrikstad, danska liðinu Esbjerg, enska liðinu Reading, sænska liðinu Norrköping, tyrkneska liðinu Konyaspor og loks síðast á mála hjá sænska liðinu Hacken.

Gunnar Heiðar á að baki leiki með öllum landsliðum Íslands og þar af 24 A-landsleiki, og skorað 5 mörk í þeim. Auk þess 7 leiki með U21-landsliðinu, 5 leiki með U17 landsliðinu og 1 mark og 3 leiki með U15 landsliðinu.

Gunnar Heiðar Þorvaldsson hefur stórt Eyjahjarta, og hefur mikinn metnað fyrir því að ÍBV byggi upp öflugt lið. Nú mun Gunnar Heiðar verða hluti af þeim hópi leikmanna, þjálfara og knattspyrnuráðsmanna sem munu sameiginlega í góðu samstarfi efla ÍBV og búa til öflugt lið.

Knattspyrnuráð ÍBV býður Gunnar Heiðar velkominn á ný til liðs við ÍBV og alla fjölskylduna velkomna heim á Eyjuna fögru.

ÁFRAM ÍBV, alltaf og alls staðar.