Undanúrslitin hjá körlunum voru æsispennandi. Í fyrri undanúrslitaleik dagsins mættust ÍBV og Víðir og þurfti framlengingu til þess að knýja fram úrslit. Staðan eftir venjulegan leiktíma var 7-7 en í framlengingunni reyndust Eyjamenn sterkari og sigruðu 13-7. Leikurinn bauð upp á rafmagnaða spennu, 5 rauð spjöld, 10 vítaspyrnur, sérstaka dómara og fullt af umdeildum atriðum. Í seinni undanúrslitaleiknum sigraði Valur Vini frá Akureyri einnig eftir spennandi leik. Það verða því Íslandsmeistar Vals og ÍBV sem leika til úrslita á morgun í Laugardalshöll og hefst leikurinn kl. 16:00.

Strax eftir framlengdan Futsal leikinn keyrðu strákarnir í Reykjanesbæinn og léku æfingaleik við úrvalsdeildarlið Grindavíkur. Leikurinn tapaðist 5-2. Mörk ÍBV skoruðu Matt Garner og Arnór Eyvar Ólafsson.

Strákarnir hafa staðið í ströngu um helgina, fjórir leikir, Herjólfsferðir í vondum veðrum og ökuferðir um ófærar heiðar, en uppskera erfiðisins er möguleikinn á Íslandsmeistaratitli.