Eyjólfur Sverrisson, landsliðsþjálfari U21 karla, hefur valið hópinn sem mætir Kasakstan í undankeppni EM 2015 á Kópavogsvelli.  Leikið verður þriðjudaginn 10. september á Kópavogsvelli og hefst leikurinn kl. 16:00.  Eyjólfur valdi tvo eyjamenn í hópinn, Brynjar Gauta Guðjónsson og Gunnar Þorsteinsson.

Þetta er sami hópur en kom saman fyrir leikinn gegn Hvít Rússum þar sem íslenska liðið fór með sigur af hólmi, 4 - 1, 14. ágúst síðastliðinn.  Liðið er með fullt hús eftir þrjá leiki og er í efsta sæti riðilsins. Kasakar eru með 3 stig eftir tvo leiki, lögðu Hvít Rússa á útivelli en töpuðu gegn Armenum á heimavelli.  Þeir munu koma hingað frá Frakklandi en þeir mæta heimamönnum 5. september.

Síðar sama dag mun svo A landsliðið mæta Albaníu á Laugardalsvelli í undankeppni HM svo það verður nóg um að vera fyrir knattspyrnuáhugafólk þennan dag.

ÍBV óskar þeim Brynjari Gauta og Gunnari innilega til hamingju með þennan árangur.