Í vikublaðinu Fréttum er greint frá því að Fjölskyldu og tómstundaráð hafi veitt ÍBV-íþróttafélagi leyfi til að selja nafn á hið nýja glæsilega fjölnota íþróttahús sem senn verður tekið í notkun. Hvers vegna? . ÍBV-íþróttafélag rekur gríðarlega umfangsmikið og fjárfrekt barna og unglingastarf. Og hefur á síðustu árum lagt metnað sinn í að bæta enn frekar starfið sem kostar félagið rúmar 30 milljónir í ár. Þetta eru miklir fjármunir. Iðkendur greiða æfingagjöld, sem eru með þeim lægstu á landinu. Þau nema samtals  8 milljónum króna. Það er því ljóst að félagið þarf að afla mikilla tekna til að brúa bilið milli kostnaðar og framlaga iðkenda, ef ekki á að hækka gjöldin. Félagið leitar allra leiða til þess að ekki þurfi að hækka æfingagjöld eða auka kostnað heimila í Vestmannaeyjum og alls ekki á þessum tímum þegar illa árar og öll gjaldtaka bitnar harðast á þeim sem minnst mega sín. Það er af þessum ástæðum sem ÍBV-íþróttafélag sækir um þetta leyfi og af sömu ástæðum samþykkir Fjölskyldu og tómstundaráð erindi félagsins.