ÍBV Íþróttafélag

 

Fordómar eru þegar einhver er áreittur, útilokaður, sniðgengin(n) eða mismunað vegna útlits, uppruna, kynþáttar, litarháttar, kynferðis, kynhneigðar, skoðana, trúar, fötlunar, efnahags eða annarra aðstæðna. Það er því miður staðreynd að á Íslandi verða einstaklingar fyrir fordómum og aðkasti m.a. vegna uppruna síns. Öll þurfum við að

 

leggja okkar af mörkum til að koma í veg fyrir fordóma í íþróttum hvort sem um er að ræða félög, þjálfara, leikmenn, áhorfendur eða aðstandendur. Með samstilltu átaki getum við áorkað miklu og sparkað fordómum út úr íþróttum.

 

 

Ef einhver einstaklingur í kringum þig er haldinn fordómum skaltu ekki taka undir með honum heldur benda á að þú sért ekki sammála. Þú getur frætt aðra um að fordómar eigi ekki rétt á sér í íþróttum eða annars staðar. Einnig getur þú beðið fólk að setja sig í spor þess sem það fordæmir og þá opnast oft augu viðkomandi. Við eigum að koma fram við aðra eins og við viljum að sé komið fram við okkur sjálf. Sýndu þeim sem verða fyrir fordómum stuðning og liðsinntu þeim.

 

Ef þú verður sjálfur fyrir fordómum, mundu að þú stendur ekki ein/einn. Reyndu að finna einhvern sem stendur með þér og styður þig og þú getur talað við. Það geta verið vinir, foreldrar eða þjálfarinn, einhver sem þú treystir.

 

 

Einelti er að ofsækja einhvern með endurtekinni stríðni, illkvittnum uppnefnum, ógnandi, árásargjarnri framkomu og útilokun frá félagsskap. Oft er erfitt að greina einelti en það birtist í flestum hópum í okkar samfélagi. Eineltið birtist t.d. oft í þeirri mynd að einhver er skilin(n) eftir útundan. Einelti veldur jafnan miklum kvíða hjá viðkomandi og vanlíðan. Öll þekkjum við einhvern einstakling sem hefur verið strítt mikið en hefurðu hugsað hvernig þér myndi líða í hans sporum? Einelti er eitthvað sem við viljum alls ekki sjá í íþróttum frekar en annars staðar.

 

 

Þú getur sleppt því að taka þátt í eineltinu. Þú getur einnig sagt öðrum frá, t.d. vinum þínum að það sé rangt að leggja einhvern í einelti. Börn geta sagt þjálfara, eða öðrum fullorðnum sem þau treysta frá eineltinu. Mjög mikilvægt er að sýna þeim sem verður fyrir eineltinu stuðning með því að ganga til liðs við hann/hana og mótmæla svona framkomu. Ef þú gerir ekkert og þegir heldur viðkomandi að þér finnist þetta allt í lagi og þú tekur þar með þátt í eineltinu. Hvernig fyndist þér ef svona væri komið fram við þig? Ef þú verður sjálfur fyrir einelti, mundu að þú stendur ekki ein/einn. Reyndu að finna einhvern sem stendur með þér og styður þig og þú getur talað við. Það geta verið vinir, foreldrar eða þjálfarinn, einhver sem þú treystir.

 

 

ÍBV leggur áherslu á að íþróttir séu leiknar á heiðarlegan hátt og hvetja alla sem koma að íþróttinni til að sýna öðrum þátttakendum virðingu. Öguð og jákvæð framkoma ætti að vera markmið sérhvers leikmanns á vellinum. ÍBV hefur tekið saman þau meginatriði sem felast í heiðarlegri framkomu og hvað hægt er að gera til að auka veg íþrótta og gera þær sem mestar.

 

 

 

 

• Leikmenn ÍBV leiki íþróttir án alvarlegra leikbrota og án rifrilda við dómara.

 

• Þjálfarar félagsins hvetji leikmenn sína til að leika heiðarlega og reyni ekki á þolinmæði dómarans. Þjálfarar eru fyrirmyndir leikmanna.

 

• Áhorfendur njóti leiksins, hvetji leikmenn sína áfram og sameinist um að útiloka öll niðrandi ummæli til leikmanna og dómara inni á vellinum, sama hvað á dynur.

 

• Forráðamenn ÍBV sinni starfi sínu af ábyrgð og heiðarleika.

 

• Foreldrar og forráðamenn barna hvetji þau til að leika heiðarlega, styðji við bakið þeim í íþróttunum, mæti á leiki og sýni stuðning við allt liðið og sleppi öllum niðrandi ummælum um leikmenn og dómara.

 

• Fjölmiðlar, félagið og foreldrar ýti undir heiðarlegan leik með jákvæðri umfjöllun og umræðu