Tryggvi Kr. Ólafsson skrifar frá Hásteinsvelli

Það voru vonsviknir áhorfendur sem fóru af Hásteinsvelli í dag þegar Eyjamenn Fylki í heimsókn, nema að sjálfsögðu stuðningsmenn Fylkis. Það var ljóst fyrir leikinn að Eyjamenn yrðu að vinna til að komast frá fallsvæðinu en það tókst ekki í þetta sinn og tapaði ÍBV þarna sínum 7. leik á tímabilinu. Þetta er engan vegin ásættanleg staða og ljóst að það þarf eitthvað að gera til að stappa stálinu í leikmenn ÍBV. Hins vegar geta Fylkismenn verið ánægðir með stigin þrjú sem þeir náðu að hala inn í dag enda komnir nokkuð frá fallsvæðinu með þessum sigri.

Leikurinn fór rólega af stað en á 11. mínútu komst Steingrímur einn inn fyrir vörn Fylkis en skaut í stöng. Steingrímur var óheppinn þarna og var þetta ekki í eina skiptið í leiknum sem lánið lék ekki við Eyjamenn.

Á 14. mínútu átti Páll Hjarðar skot að marki Fylkis eftir hornspyrnu en skotið hafnaði í varnarmanni Fylkis og smaug framhjá stönginni.

Það var eins og Fylkismenn vöknuðu við þetta því þeir komust meira inn í leikinn og á 19. mínútu komst Björgólfur einn inn fyrir vörn Eyjamanna eftir góða sókn en náði ekki að setja boltann framhjá Birki í markinu sem varði frábærlega. Fylkismenn héldu áfram að sækja og á 27. mínútu bjargaði Páll Hjarðar á línu eftir þunga sókn Fylkismanna.

Það dróg síðan til tíðinda á 35. mínútu. Björgóflur fékk boltann fyrir utan teig, vinstra megin, eftir að boltinn hafði gengið manna á milli og smellhitti boltann í fjærhornið, óverjandi fyrir Birki.

Á 40. mínútu var brotið gróflega á Adolfi Sigurjónssyni við vinstra vítateigshorn Fylkismanna en dómarinn taldi ekki um brot að ræða heldur fengu Fylkismenn innkast. Adolf lá eftir enda kom í ljós að hann hafði farið úr axlarlið. Það er með ólíkindum að dómari leiksins skildi ekki sjá brotið því leikmaður Fylkis renndi sér aftan í Adolf þegar hann var að senda boltann fyrir og fór fyrir sendinguna en tók Adolf niður í leiðinni. Klárlega um brot að ræða og verðskuldaði a.m.k. áminningu.

Stuttu síðar fékk Páll Hjarðar að líta gula spjaldið fyrir brot sem var töluvert vægara en brotið á Adolf stuttu áður.

Bjarni Rúnar, sem komið hafði inn fyrir Adolf, átti síðasta orðið í hálfleiknum en skot hans fyrir utan teig fór rétt framhjá Fylkismarkinu. Staðan í hálfleik var því 0-1.

Seinni hálfleikur byrjaði á svipuðum nótum og sá fyrri þ.e. Steingrímur fékk sannkallað dauðafæri en Bjarni í marki Fylkis varði vel skalla hans.

Eyjamenn misstu síðan leikmann útaf með rautt spjald á 58 mínútu þegar Páll Hjarðar fékk sitt annað gula spjald og núna fyrir að fara of hátt með fótinn, án þess þó að snerta mótherja. Stuðningsmenn Eyjamanna voru ekki ánægðir með þessa ákvörðun dómarans og fannst mörgum sem dómarinn hefði hreinlega verið að bíða eftir að Páll bryti af sér þannig að hann gæti rekið hann útaf.

Fylkismenn kláruðu nánast leikinn stuttu síðar þegar Viktor Bjarki skoraði gott mark með skoti fyrir utan teig en færið kom eftir að Fylkismenn höfðu fengið umdeilda aukaspyrnu á miðjum vellinum. Fylkismenn voru fljótir að taka spyrnuna og voru Eyjamenn enn að mótmæla við dómara leiksins þegar Viktor Bjarki lét skotið vaða.

Á 72. mínútu gerðu Eyjamenn harða hríð að marki Fylkis en inn vildi boltinn ekki fara og áttu þeir m.a. skot í þverslá og varnarmann áður en Bjarni í markinu náð boltanum. Var með ólíkindum að sjá þetta og var eins og Eyjamönnum væri fyrirmunað að skora.

Fylkismenn ráku síðan síðasta naglann í kistu Eyjamanna á 88. mínútu en þá skoraði Björgóflur eftir hornspyrnu frá vinstri. Birkir fór út í sendinguna en náði ekki boltanum sem barst út í teig þar sem leikmaður Fylkis var einn og óvaldaður. Hann sendi boltann fyrir markið þar sem Björgólfur lúrði á fjærstöng og átti ekki í vandræðum með að senda boltann í autt markið.

Leikurinn í heild sinni var í sjálfu sér þokkalega leikinn og nokkuð um færi, sérstaklega hjá Eyjamönnum, sem ekki nýttust. Það er eins og Eyjamenn séu dæmdir til að fara niður því það virðist ekkert ganga upp og sjálfstraustið er greinilega mjög lágt þessa stundina. Með smá heppni hefðu Eyjamenn getað unnið leikinn en heppnin var ekki með þeim í dag. Af leikmönnum ÍBV stóðu þeir fyrir sínu Birkir í markinu, Ian Jeffs og Atli.

Fylkismenn nýttu hins vegar sín færi vel og voru vel að sigrinum komnir. Boltinn gekk betur hjá þeim en mótherjunum og þeir virtust eiga auðveldara með að finna samherja. Hjá Fylki stóð Björgólfur uppúr ásamt Bjarna Þórði. Þá var Valur Fannar traustur í vörninni.

Landsbankadeildin:

Hásteinsvöllur laugardaginn 2. júlí 2005 kl. 16:00.

Lið: ÍBV-FYLKIR

Lokatölur: 0-3

Hálfleikstölur: 0-1

Aðstæður: Völlurinn hefur sjaldan verið betri.

Veður: Ágætisveður, austan gola og 11-12 stiga hiti.

Áhorfendur: 250-300

Skemmtanagildi á skalanum 1-10: 5

Maður leiksins: Ian Jeffs

Frammistaða dómara á skalanum 1-10: 5 (Erlendur Eiríksson )